അങ്ങനെ അത് സംഭവിച്ചിരിക്കുന്നു. ലോകത്തിലെ ഏറ്റവും സമ്പന്നന് ഇന്ത്യയിലെ ഇന്റര്നെറ്റ് രംഗത്തെ മാറ്റിമറിക്കുന്നതിനായുള്ള ഔപചാരിക പ്രവര്ത്തനങ്ങള്ക്ക് തുടക്കം കുറിച്ചിരിക്കുകയാണ്. സാറ്റലൈറ്റ് അധിഷ്ഠിത മൊബൈല് കമ്യൂണിക്കേഷന് ലൈസന്സിനായി ടെലികോം വകുപ്പില് അപേക്ഷ സമര്പ്പിച്ചിരിക്കുകയാണ് സ്പേസ് എക്സിന്റെയും ടെസ് ലയുടെയുമെല്ലാം സാരഥി ഇലോണ് മസ്ക്ക്. സ്പേസ് അധിഷ്ഠിത ബ്രോഡ്ബാന്ഡ് സേവനങ്ങള് സ്റ്റാര്ലിങ്ക് എന്ന സംരംഭത്തിലൂടെ നല്കുകയാണ് മസ്ക്കിന്റെ ഉദ്ദേശ്യം. ഇത്തരം സേവനങ്ങള് നല്കുന്നതിന് പരീക്ഷണാടിസ്ഥാനത്തില് നേരത്തെ സ്പേസ് എക്സ് ഇന്ത്യയില് അപേക്ഷ നല്കിയിരുന്നെങ്കിലും പിന്നീട് പിന്വലിച്ചിരുന്നു. പുതിയ നീക്കത്തോട് കൂടി ഇന്ത്യന് ശതകോടീശ്വരനും റിലയന്സ് ഇന്ഡസ്ട്രീസ് അധിപനുമായ മുകേഷ് അംബാനിയുമായി നേരിട്ടുള്ള യുദ്ധത്തിനിറങ്ങുകയാണ് ഇലോണ് മസ്ക്ക്. നിലവില് സാറ്റലൈറ്റ് അധിഷ്ഠിത ഇന്റര്നെറ്റ് സേവനങ്ങള്ക്ക് രാജ്യത്ത് ലൈസന്സ് ലഭിച്ചിരിക്കുന്നത് റിലയന്സ് ജിയോ ഇന്ഫോകോമിനും ഭാരതി ഗ്രൂപ്പ് പിന്തുണയ്ക്കുന്ന വണ്വെബ്ബിനുമാണ്.
സാറ്റലൈറ്റ് അധിഷ്ഠിത ഇന്റര്നെറ്റ് സേവനം; അംബാനിയോട് മസ്ക് ഏറ്റുമുട്ടുമ്പോള്
