കേരളത്തിലെ സംരംഭങ്ങളില്‍ നിക്ഷേപം നടത്താന്‍ താല്‍പര്യമുണ്ടെന്ന് ലോകത്തിലെ ഏറ്റവും വലിയ പ്രൈവറ്റ് ഇക്വിറ്റി ഫണ്ടായ ബ്ലാക്ക്‌സ്റ്റോണിന്റെ സീനിയര്‍ മാനേജിങ് ഡയറക്ടര്‍ മുകേഷ് മേത്ത. ഐബിഎസ് സോഫ്റ്റ്വെയറിന്റെ രജത ജൂബിലി ആഘോഷച്ചടങ്ങിനിടെ വേദിയില്‍ ഉണ്ടായിരുന്ന മുഖ്യമന്ത്രി പിണറായി വിജയനോടാണ് അദ്ദേഹം ഇതു പറഞ്ഞത്.
മികച്ച അടിസ്ഥാന സൗകര്യങ്ങളും മനുഷ്യവിഭവ-നൈപുണ്യ ശേഷിയുമൊരുക്കി കൂടുതല്‍ സംരംഭകരെ കേരളത്തിലേക്കു സ്വാഗതം ചെയ്യുമെന്ന മുഖ്യമന്ത്രി പിണറായി വിജയന്റെ പ്രസ്താവനയ്ക്കു മറുപടിയായിട്ടാണു മേത്ത ഇതു പറഞ്ഞത്. കേരളത്തിലെ അടിസ്ഥാനസൗകര്യ മേഖലയിലെ വ്യാപ്തി, മനുഷ്യശേഷി, മലയാളികളുടെ തൊഴിലിനോടുള്ള അര്‍പ്പണ ബോധം എന്നിവ വലുതാണെന്നും ഐബിഎസിന്റെ വളര്‍ച്ച ഇതിനു തെളിവാണെന്നും അദ്ദേഹം പറഞ്ഞു.
